ليه الولد ممكن ينفر من بنت بيحبها ؟
_ لو البنت ضاغطة عليه نفسيا كنت فين ومع مين وبتعمل ايه وجو المخبرين ده ودايما محسساه أن الدنيا خراب وانه مش هيعرف يعمل حاجة في سنته
" العربية دى هتسدد عشرين ألف جنيه " 😂 .
_ لو بتنتقد أهله بشكل ملحوظ هينفر منها حتى لو أهله فيهم العبر .
_ لو باردة ومبتغرش عليه ، صحيح القاعدة العامة أن الراجل بيكره الغيرة بس بيكره الغيرة العامية وعلى العكس لو رامية طوبته ومحسساه انه قرش ممسوح هيلف يلف وهيجى هيحسك مستقلياه وهيعمل كل ما اوتيح له من غلط عشان يحرك فيكى غيرتك .
_ الكلام الكتير اوووفر بيموت العلاقة بدرى حتى لو بتعشقوا بعض ، البدايات كلها لهفة واشتياق بمعدل أسرع يكاد لا ينقطع إنما مع الوقت الفترة مابين كل لهفة ولهفة هتقل فلو كنتى الطرف المبادر دايما بالمكالمات والمقابلات هينفر منك لأن الراجل بالفطرة سورى في التعبير بيحن انه يجوع فاليه نشبع حد هو كيفه اصلا انه يجوع !!!
والجوع هنا مش بمعنى الطفاسة بمعنى أنه بيحب يعافر عشان يوصل ميحبش الحاجة السهلة بيحب الحاجة الصعبة و بيستمتع برحلة الوصول ليها
من الاخر كده " شوق ولا تدوق " .
_ طيب اخواتنا في الله 😂 اللى صحبتها تقولها اتقلى عليه تقعد بالاسبوع مختفية ولو ردت ترد بغموض وبسخافة
ده اسمه هبل وهيحسك يأما عبيطة يأما بتتكبري عليه أو لو فطن شوية هيفهم انك بتتقلى هيقوم هو كمان تقلان وشكرا كده .
_ طبعا كونك متسلطة وعايشة في دور امه دى حاجة تخنق اى حد .
_ انك تكونى ضعيفة وغلبانة بزيادة هيحس انك أكلة بايتة ملهاش طعم حلاوتها راحت .
_ الحب ده احساس جوانا بيخلينا نميل وننجذب ونتعلق بشخص ما ومش هو الركن الاوحد اللى بتقوم عليه العلاقة ياما علاقات مكنتش عن حب ونجحت بالتفاهم والاحترام وخفة الدم والشياكة وياما قصص حب انتهى بيها الحال لدفاتر في محكمة الأسرة .
_ لو مش مهتمية بنفسك هيقارن غصب عنه وهيمل مع مرور الوقت .
_ البنت سليطة اللسان بينفر منها الكل مش بس اللي بيحبها .
_ لو اخترتى تحبي حد بأرادتك وكنتى في جانب من الجوانب أعلى منه ، مينفعش ابدا مهما حصل تحسسيه بالفرق أو تحاولى تقارنى أو تقللى منه حتى لو في خناقة وكنتى فيها على حق خدى حقك بأى طريقة الا النقطة دى بالذات لأن الراجل بيحوش الإهانة وبيفضل فاكرها سنين ولو خد عنك انطباع انك مستقلياه مش بس هينفر منك ده هيكرهك .
_ بلاش يبقي حواراتك كتير مش فلان اتقدملى وعلان عكسنى وفي ارقام بترن عليا ونص مصر القديمة بتجري ورايا
الحاجات دي اه وارد انها تحصل لكن لما تتعمل كتير بغرض انك تخليه يغير أو لاى غرض تانى هيفهم وهيزهق .
_ بلاش تكدبي حتى لو في نظرك الكدبة بيضة لأن الكدب بيلزق في صاحبه كتير .
_ خليه يحس انك مرايته صديقه الامين اللى هينقده وهيعرف يوجهه صح متبقيش مطيباطية دايما خلي رأيك يُحترم ويبقي مهم عنده يسمع وجهة نظرك في كل موضوع مُقدم عليه .
_ التنازلات مابتغليش صاحبها . ✋
#نصايح_بطة 💁
#post_2 🕯️
0 التعليقات:
إرسال تعليق